إلي أمي
بالعامية المصرية
الشاعر / إبراهيم فاضل
==============================
هتيجي إمتى ياست الكل
وتفرشي الأكوان بالفل
أنا من غيرك أنا
مشفتش غير الأسى والذل
هتيجي إمتى ياست الكل
==============================
ستي أنا ..تاجي أنا ..روحي أنا
عمري أنا.. جذري أنا.. حبي أنا
أنتي السنا .. وأنتي الصبا.. وأنتي الهنا
وأنتي طريق النور في أيام ضلمتي
وأنتي الحياة في دنيا نسيتْ محنتي
وأنتي ربيعي وأنتي شبابي وعزوتي
وأنتي السنين اللي راحتْ
واللي جاية وفرحتي
ياأحلى بسمة لما تطل
هتيجي إمتى يا ست الكل
==============================
الحياة علمتهاني كلمة كلمة
والحنان شربته منك في كل ضحكة
والأمل عرفته فيكِ لما ضعت
والأمان حسيته منك لمَّا خُفت
أنتِ جحيمي وجنتي
جحيمي لما بتبعدي
والجنة لما تقربي
قربي.. قربي..قربي
إياكِ تاني تبعدي
يا أحلى بسمة لما تطل
هتيجي إمتى ياست الكل
==============================
أنا عارف والله أنك جايه
وشايلة الفرحة علي جبينك
ومواكب نور رايحة وجاية
والدنيا واقفة تغني لكْ
أنا جاي لك قبل ما هتجيلي
أحكي لكْ مرة وتحكيلي
إزاي البعد وقف بينا
وشايلك أحلامي معايه
أنا عارف إنك مشتاقة
للفرحة وللضحكة معايه
ياأحلى بسمة لما تطل
هتيجي إمتى ياست الكل
=============================
بفلمي / إبراهيم فاضل
=============================