عودة الى العاميه

انشودة حياه
(16)
من كشكول تلميذ
علمونا فى المدارس
-----------------
علمونا الهم وعلمونا الغم
وعلى بعضى مقدرش اتلم
امشى واقع وأقوم
وجوايا انا مكتوم
محتاج لتغير دم
علمونا
ان الحاجات لازم تتم من سكات
علمونا فن  التوحيش
والسكه اللى ماتوديش
تبقى عايش ميت
ويقولك عيش
علمونا شرب الاحزان
وودونا لبتوع الجان
سجنونى جوايا وفى نفسى
وخلونى سجن وسجان
قالولى الريح رايح مش جى
وعنوانك مش نفس الحى
وشمسك بتهرب من الضى
ويا خبتك التقيله يا خى
قالولى الفجر بيهرب من النور
والقمر جى يشهد زوور
وزهر الصبار اصله عطور
قلبى اضيق  قلبى دق
بقى يفرفر كما العصفور
علمونا من غير جناح...الطير يطير
وتلاقى طوبه ماسكه فى ايدين أمشىر
وان صهيون دى وطن والفلسطينى أجير
والمواطن بقى غريب ومش من حقه يغير
علمونا فى المدارس
هزر وكسر
اصل مفيش حارس
وده ملك ياوراث
علموناازاى  ننط السور
وتانى يوم نشهد زوور
واللسان جوانا اخرس
علشان احنا بسترخص
علمونا نوحش  الحلو
ونحلى التوحيش
ونستكين نقفل ببان
ونعطى شيش
علمونا مفيش جراءه
ومفيش كمان براءه
علمونا فن التهويش
علمونا ان الاجابه فى الامتحان
بيقسوها هناك بالسنتى
اعلن لسانى صمتى
علمونا
نتوه من روحنا ...وسكونها فى برج عاج
كانت حدودنا باب وادراج
ونسفر الحلم بره عشان اعرج
علمونا ان العلم اصبح بضاعه
وفطموا الحلم من الرضاعه
ولو علي صوتك تلقى صوت
يموت جواك السكوت
ويقول انكتموا ياجماعه
-------------------------------
الجزء (1)