(( بسمة ))
في ستر الليل 
غمضت العين 
وقلت اسمى وانام
ولا نورك يزغللنى 
ولا أحلام تبهدلنى
ولا صورتك تخايلنى
لأنى خلاص نويت النوم 
حضنت ضلوعى جوايا 
وشديت على جسمى نسمايه
وعلى رجلى اخدت التانية 
تسليها 
وحطيت رموشى على عينيا 
تغطيها 
ولسه بسمى بسم الله
طلعتيلى كما جنيية 
مسحوره
رسمتى الصورة جوايا 
ارتعدت كل أركانى 
بفتح عينى على استحياء 
لمحتك جنب نجمايا 
بدأت أهدأ 
وراحت الرعشة باستثناء 
قلبى زايد الدقات 
وشفت القمر إنتى 
بكل ملامحك وتفاصيلك
وحتى طرف منديلك 
وخصله شعر بلون ليلك 
بتتمايل على خدك 
مع النسمات 
ادقق فى الوصف من تانى 
اقول إنتى 
لكن ف الكون مين زيك 
يكون القمر سارق شويه 
من ضيك 
اقول لأ . دى هيه بحق 
لكن ناقصة شيء أجمل 
من الأنوار 
وحسنك اللى خلى عقلى احتار
وليلى اللى قلبته نهار 
وحاجات كتير تانيه 
لكن فى كسر م الثانيه
لقيته ناقصة شىء بيدوم
وقاتله في عنيا النوم  
مفهشى البسمه اللى 
ترد الروح 
سعيد عباس الضو