قبل الغرق
*************
من بين جدار المستحيل
قلبي العليل
 اللي انزرع بين الضلوع
لساه حزين
رافض يوافق ع الرجوع
أو يستكين
ومناه يطوف كل الظروف
من غير عويل
ومناه يشوف مين الشغوف
يبدر أنين
جوه القلوب العاشقه دايما للحياه
واللي مناها يترسم طوق النجاه
علي شط حلمي اللي اندفن 
تحت التراب من غير دليل
ويمد ايده ف حلق اسراب المحيط
ينقذ عبيط  قبل الغرق
 ومعاه يشيل حلمه البسيط
ويكون له ف الدنيا المعين
أو يستعين
بعيون ما تعرف يوم قلق
تبحث معاه.. عن حلم تاه
ف بطون سراديب الحياه
أو قد يجوز انه انسرق 
مع اللي فاضل من سنين
قلبي الحزين
قلبي اللي كاره للزعل
لساه بينسج ف الأمل
ويجمع الحرف اللي تاه 
وسط الجُمل
ومناه يكون ف الكون أسد
أو حتي يلعب دور جَمل
اصله خلاص ناوي الخلاص
من محتوي دور الحمل
اللي تملي بينكتب فوق الورق
 بدموع بتنعي حظها 
 وبتشتكي ظلم السنين
قبل الغرق
قلمي اللي لسه ما انشنق
حاسس بخوف
ومناه يدون ع الورق 
بعض الحروف
يبقوا الأمل
 لنهار ولسه وبيتولد
من ليل حزين
يبقوا الجُمل 
تطرح شجر
يتربي من خيرها الجنين
***************************
رضاابو الغيط