إحسان 
                     كلمات / زينب سالم 
إحسان لله يا موحدين بالله 
بأمد إيدي و جوايا مخبية الآه
معاك يا سيدي لقمة و الا هدمة
بتبص لي و برضه قال ما معاه
يرضيك شكلي و لا شيءساترني
بعنيك شايفني و بتقول يا ولداه
مصمصة شفايفك و انا بأنده لك
شوية وتجري و كإني باجري وراه
إيدي على خدي و اللقمة على أدي
البطن ممغوصة فاضية و ده وعدي
هما دول ناس يا رب اللي بتعدي
قلوبها ماتت و الرحمة قانونها تاه
كل وجع جوايا هتتحاسبوا عليه
ده ربنا وصاكم يافندي و يا بيه
خدوا بإيدينا و الخير فورا تلاقيه
الدنيا دبحتنا و نسينا طعم الحياه
عيشتنا عذاب و الغني دنيته وخداه
لا مهتم بينا حتى الخوف من الله
بيجروا هنا و هناك و انا القرش محتاجاه
قلوبكم دي من حجر و عيونكم قوية
لا احنا على بالكم و لا هدومكم مبلية
بتستغربوا ليه بنحقد و الغل شارباه
عشتوا دنيتكم بين المال و الجاه 
ياعيني علينا حتى العيا ما نلاقي دواه
بس لو تبصوا علينا بحنية شوية
و تاخدوا بإيدينا و بنية مرضية
كفايانا وجود الف جمعية خيرية 
ما شوفنا منها لقمة و لا حتى جلابية
نفسي الاقي هدمتي و معاها لقمتي
يبقى كتر خيركم بحيطة تلم جتتي
إحسان لله و بصوا علي و على دمعتي
                   كلماتي / زينب سالم