** حاولى ياامه تفرحى **
*********************
حاولى ياامه تفرحى
وتصبحى 
على شمس جايه من بعيد
وحشاها رؤية ضِحكتك
جايه ليكى
 بين عينيكى وف ايديكى
لأجلك انتى ف مطرحك
قومي ياامه فصلي
من ضحكتك توبي الجديد
واتجهزى واتحضري
  د الفرح راجع للوريد
لسه حُزنك ع اللى راح
والولوله طارحه النواح
والمقاسي والجراح 
لساها ساكنه ف مطرحك
طالة البدر ف سمانا
 يوم لُقانا
عمره ياامه ما فَرحك
ياما ياامه فوق كتافى  
كنت با اجرى بيكى حافى
لأجل ما ألحق م السعاده
ليكي ياامه لحظتين
كنت شايلك فوق كتافي
 واللى شالك ف الحقيقه 
يا حبيبتي نن عين
اوعي ياامه  يوم تخافي
أو تهابي الغدارين
امسحي وبطرف شالك
للي شالك ...دمعتين
لسه فيه طرحى الصغير 
نفسه فيكى
لسه محتاج الحنان اللى ما ليكى
حاولى ياامه ....تعيشى بكره
 بكره ليكى
وف ايديكى
 شايف الحب اللي طارح
للحبايب فرحتين
مدى ايدك
 واسندى طرحى الصغير
 واعدليه
علميه بالحب ياامه
 انى بكره جاي ليه
ابدرى ف قلبه المحبه
 وامسحى دمعة عينيه
نفسى طرحى لما يكبر
يبقى عوده ياامه صلب
مهما يلقي م الأسيه
 وللا هبت ريح عليه
حاولى ياامه تِفرحى  ...
وبحنانك فرحيه
فرحى عصفور  بيحبى
 ع الشجر
كونى ليه عش الامان .......
نقطة مطر
بلي ريقه م العطش
وبايديكي. اطعميه ..............
اطعميه من شهد حُبك 
من جديد
خلى حُبك جوا قلبه
دم يجرى ف الوريد
امنحيه لحظة امل
بإبتسامه من شفايفك
أو بلمسة كف ايد
صدقيني بكره راجع
غصب عن ام  المواجع
والسعاده هتلاقيها 
بكره ياامه ع الأفيش
مدي ايدك ف المشنه
لسه لينا فيها عيش
حاولى ياامه تفرحى
انتى ليه ما بتفرحيش
اعشقى تانى السعاده
وإلبسى توب الرياده
انسى كل الهم ياامه
وانسى طعم القهوه ساده
مش بعاده
الفرح يهجر قلب أمى
مش بعاده
 مش بعاده الفرح ياامه 
ما يناديش
ردى ياامه ساكته ليه
قولى ليه ما بتفرحيش
وللا ليه ما بتضحكيش
د الحياه من غيرك انتى 
يا حبيبتي. ما تساويش
*****************
رضا ابو الغيط