البقاء لله ياصاحبي
.
.
البقاء لله يا صاحبي....
شد حيلك ….كله فاني.....
وإبقى قول لو عوزت حاجة…..
وإنتا عارف فين مكاني.....
و إحنا أهل مفيش كسوف ......
حد ضامن الظروف؟
وإنتا عارف.....
عيني ليك....
وإحنا عشرة....
وعيب عليك....
إنتا خيرك برضه سابق....
وإللي بينا مش شوية.....
إللي راح كان زي أخويا.....
وكان جدع...
ويخاف عليَّا.....
وكنت أحس إيه مضايقه.....
وهوّ جاي من بعيد.....
وكان فاهمني زيي وأكتر ....
وكنت أنا صاحبه الوحيد.....
من و كّنا صغيرين.....
إتناقشنا ف كل حاجه....
كورة ..
فن..
سياسة...
دين....
وله معايا....ميت حكاية …..
و ذكريات ملو السنين ....
ربنا يجمع مابينّا ف حته أحسن.....
قول أمين....
.
.
.
هوا مين بيعزي مين؟
وللا اعزّي إزاي ف دمي؟
ع العموم متشيلش همي....
و خللي بالك بس منك....
مش بقول تنساه لكنك....
عارف إن الدنيا ماشية....
و بكره نبقى كويسين.....
وإبقى زوره كل جمعه......
وإقرا عدية يس.....
وإنتا عارف....
لو هينفع....
كنت أجيلك.....
و البقاء لله يا صاحبي....
وشد حيلك....
.
.
....
إللي فات.....
نَصّ تلغراف وصلني من ساعات.....
و كان عزا نصي إللي عايش.....
ليّاَ....
ف النص اللي مات.
