على أطراف الجنان ................
بحبك بملو إتساع الفضاء .
ووسع الخيال جوّه بال الشريد .
هعدّى لحبك حدود المحال .
عِشقت الجهاد لجل أصبح شهيد .
وهطحن ثوانى الليالى الطويلة .
لحاد ماهحضن صباحى الجديد .
وخايف أقابلك فى أبعد مدايا .
الاقى إن حلمى بلؤاكى بعيد .
شبيهه بشمس الربيع الرضيعه .
وقُربك حرارته تسيّح حديد .
هجيلك حقيقى بأمالى الجعانة .
برعشة شفايفى . وعطشى الشديد .
هلاقى فى عينيكى . ملامح زهولك .
وهسمع شفايفك . بتنبت سؤال .
- حبيبى اللى غايب ؟؟
- حبيبك يا بسمة ..
وواقف فى حالة . خشوع وإبتهال
- نضارة شفايفك . هلكها الجفاف .
بتغلى فى حبى ؟
- حقيقى يا بسمة . إنى بغلى
ومكوى . ووالع . مازال
- لالئ عيونك . بتدمِى جِفونك .
- ماهو إنتى اللى . عندك بتبكى الرجال ؟
- طريقى يتوّه ..
- طريقك يتوّه ..
كأنى بعوم وسط بحر الضلال .
كأننى مسافر بفكرى الشريد .
لفكرة تجنن ماخطرت ببال .
كأنى مهاجر فى أجواء حنينى .
الى اللا نهايه بشد الرحال .
وأتارينى ماشى فى حلمى . وطريقى
سكك مستحيلة . فى دروب المحال .
- لكنك مضيّع . سنين عن ميعادك .
- يا بسمة أعذرينى . أنا بأيدى إيه .
زكايب سنينى . حمولهم ثقال .
ورحلة هواكى . فى سِكّة عيونك .
ليالى طويلة . عديمة الزوال .
مكانك يا بسمة . فى قلب الخريطة .
عناصر مشعّة . لِسحر الجمال .
- و لسّه مخزّن . هوايا اللى وجعك .
- وبحلم فى حبك . مواجعى تدوم .
هحبك لحاد . إنتهاء الوجود .
وأحبك لحاد . إنفجار النجوم .
هحبك فتشكى . الرياح للعواصف .
وتنكر شتاها . تلال الغيوم .
هحبك لحاد . أما تٍولَع قصايدى .
تعدى بحرارتها . نار السموم .
لحاد أما تُبدُر . حروفها الصحارى .
تدهّب رِمالها . وتطرح كروم .
هحبك لحاد . أمّا اجيلك بغنّى .
وأشلائى تعزف . لحون الامال .
بلاش ترفدينى . لدمامِة التّذلّل .
هتلقى فى دمامتى . معانى الجمال .
ولا تسألينى . أنا ليه بحبك ؟
وعديت عشانك . حدود المحال
