جارى التحميل
استخدم زر ESC أو رجوع للعودة
الي ريحان :
( لست وحدك من مشى علي قلبي
ولكنك وحدك من تسلقني طولا وفرعا )
الي ريحانه :
( لا تزرعي الورد من خدك فاح القمر من شهدك )
( مدخل )
مبروك الحب الجزيل
سويلو غمامة وصرة
عين وغنوة ونيل
هجرة تلطاشر قبل التاريخ
والفكرة تلطاشر بعد الهجرة
( النص )
الصباح الفاح طيبو
فتق رتق عين الشعاع
سرق لحظة مشواري معاهو
رحل ضل السماء
فارق الشوق عداهو
سكن المطر الحراز
حر ندامتو هماهو
رجع وجع الفرح
خلا بيني وبين الحرف
هجير الكلام
لما الموج غطاهو
***
بنوت الفريق شقيش شافن
لملمن الهديل معاك وزغردن
رجعن جواك إتاوقن
شافن جواك جواي رقصن
اخدت شبال عويناتن
ود العين صحا الخزاز
وردد غنواتن
عديلة يا عديلة
يا ولد يا اميرة
***
دقت الدلوكة والدنيا زحمه
نزل كرباج المطر علي ضهر الفريق
ضو الرتاين واحمر شين إنطط بلا رحمه
وصوت المادح الإنيق وصفقة طنبره
والحله من كل الجهات مربوكه
ورقصت وإيقاع الخطوة على الدلوكه
***
مواكب الفرح معاك تصفى
والمراكب لما تعدي ضفه
تطوي النيل وتمرق تحفه
والمشاوير لما تحكي
عندي ليك بشارة الزمن المعدي
بس خلي بيني وبينك شوله
أصلك منفي جواي فكره
خاتيك للزمن الحداد ستره
أمشي بينك وبين الخطوه عفه
***
يا قمره طويتي الغروب
وفي ريحانة قامتك الشروق
تعالي من الصباحات العشيات
اسقيهو من عطش السنين الواقفات
حاوريني معاهو
واديني من ضحكك زاد
واحتويني بين حروف اسمي
ورشا الحب العمرو ما عاد
***
يا ماشي وواقف
علي ركازة البت الدره
مسحور ونايم
علي كيفك مره
شفت يوم كان قبل
يومين ومده
والليل قمر
وعراقي ورادي
جالس ورجلك
علي رجل الدنيا
وحكيت إنك وهي
مشيتو علي قلبي
مرقت من عيني اليمين
وعاينت في الشمال
ضاقت عيني من الفرح
كراع في الارض
وكراع في السماء
طبيت العراقي والرادي
ونشرة المساء
وجريت علي طرف الحله
وكوركت
طويل وشو طفله
عمرو ضحكتين وجمعه
سنينو ناقصات وزايدات سمعه
ضمهيهو معاك بعفاف الطرحه
صبح ميلادو ومن ميلادك تمه
***
قول للبنيات المسافرات
في قمر الضحي الزاد
لا ينابيع أقلامي جفت
ولا مشاعر روحي خفت
ولا قلبي في سوق الغربه باير
شد عمري واسرج
عايهو عفش روحك
ولملم المسافه
البيني ورشا العناد
خلي نفسي أسيره
بين توبها ونعالها
خلي الشوق مشنوق
بين قعدتها وغيابها
***
يا سيرة مسيره ومخيره
ادخلي كفاك مروق
لملمي عدة السفر
وهوامش الضحي المشنوق
ود الصره قرأ طالع الوحيده
وشرب من بنها المحروق
مبروك قدر حبات مطر
الخريف يقالدن الحول
مبروك تناهد جواي
قدر سماحة الكلام والقول
مبروك يا أجمل زول
***
ساحة النقاش