مجلة سهر الليالى* أغنية المساء (بقلمى سليمان خطاب

حجرة شاعر
**********
حجرتى واسعة وضيقه
لا مغربة ولا مشرقه
ولسان حيطانها م السكات
مربوط ف حبل المشنقه
وصورتى وانا لسه واد
وحلمه لسه ف شرنقه
كتاب لبيرم ع السرير
جنبه ربا عيات جاهين
واللى شابك ف الايدين
مسحراتى منقراتى
ف البلاد سواح
عمر فؤاد ما كان مداح
شاعر وشعره كما العصافير
لسه صاحيه مشقشقه
وهناك على مكتبى
فاظه عطشانه دفا
والورد بالموت اكتفى
لما انطفى عودك يا خال
ودمع الفاظه سال
على دمعتك
اللى شايله ف الديوان موال
فين عكازك يا خال
هوّ كمان اختفى
وكتب كتيره
زى ورق الشجر
ف حجر الخريف
دبلانه من عرق التراب
بصالى وشيفانى
كإنى طيف
وكرسى مركون على ركبته
ما عادش قادر ع الوقوف
ودفترين باين عليهم التعب
واحد شجاعه والتانى خوف
وقلم مقصوف
شايل هموم وحدتى
وهيّا دى حجرتى
شاعر وبالقوافى بطوف