مجلة سهر الليالى* حبيبتي والجني/محمدعبدالرحيم

حبيبتي والجني
..........
رحت أخطبك ..
قالوا خطفها الجني
مالقاش جمالها
في الملاح
جالها من الأحلام
الدنيا من غيرها
بكت ..
مابقيتش بتغني
..........
عديت بحزني
ع البيوت ..
أفتحها بيت ورا
بيت
لاشفت منك
أثر ..
ولاجالي عنك
خبر
دقيت بيبان
الحلم ..
رحت وجيت
وأنا بندهك ..
صوتي إنكتم
وبقيت ..
حاسس بوحدة
وغربة
بين الناس ..
وفي كل غنوة
حزن آهة قلب
بوجعها
..........
قالوا لي دور
عليها ..
بتنادي لسة
عليك ..ماتسمعها
فاضت بحور
الدنيا بدموعها ..
والضي عتم
وفي قلوبنا ضلام
..........
يادمعتين الحلم
عدوا قوام ..
مابقيتش أنام
من حزني وغيابها ..
ولم أغمض عيني
أشوفها بخوفها
وعذابها
..........
تبكي بصوت
مدبوح ..
تنده حبيب
مجروح
وفي إيدها بل
الدمع ريش
طيري
تقصدني أنا
أصلها ..
مالهاش حبيب
غيري
ماأنا كل ناسها
وأهلها ..
وكل أحبابها
..........
وقدرت آجيلك
ياحبيبتي
واللي بيننا
كتير ..
راكب حصان
الشوق ..
وبطوى السكة
والمشاوير
..........
ويشوفني يهرب
من طريقي الجن ..
تجري علية
بشوق ولهفة ..
والدموع بتحن
وأحلفلك إني أكيد
حبيتي..كنت
هوصلك ..
ولومعاكي النهارده ..
ألف جن وجن
تضحك عينيكي
تعدي دمعة فرح ..
وأتأملك ..تشوفيني
برضه بكيت
ولما أمد إيديا
لأيديكي وأقبلها ..
ألاقيني فجأة
صحيت ..
ألاقيني فجأة
صحيت
..........
ياه .. بقى كل ده كان حلم ..يعني مافيش جني ولاحاجة؟ طب فين إنتي.. وإنتي مين؟ ولاإنتي كمان مش موجودة؟ فعلا ..إنتي مش موجودة إلاجوايا أنا وبس ..جوايا أنا وبس ..طب إمتى هتشوفك عيني؟ إمتى هتبقي حقيقة..إمتى بقى..إمتى؟
محمدعبدالرحيم