جارى التحميل
استخدم زر ESC أو رجوع للعودة
ابن الاصول
............
ابن الاصول .. له فى الحياة .. رأى و كلمه ..
يموت م الجوع .. وعمره .. ما يخون العشرة ..
و يحب يمشى صح .. مهما الدنيا .. لفّت بيه و دارت ..
يتجوّز بنت الاصول .. ولو كبرت و بارت ..
يعاشرها بالمعروف .. ولو .. شاخت و شابت ..
و اتبدلت الاحوال .. و الناس .. بقت شرايح ..
لا بقى اللى .. جاى جاى .. ولا اللى .. رايح رايح ..
الصوت الحر اختفى .. و عيال الشارع .. بقوا مشايخ ..
مسكوا زمام لامور .. و كترت .. الفضايح ..
و ابن الاصول .. ما بين .. الاصول و المشايخ .. دايخ ..
و ظهرت الفتنه .. و ابن الاصول .. بطبعه .. مسامح ..
حاول يصلح حالهم .. ما هو .. طول عمره مكافح ..
و فلت الزمام .. و بقى بينه و بينهم .. مدابح ..
و كشف اللعبه .. و العدو اللى بينهم .. جاى رايح ..
يعمل و قيعه بينهم .. و قال ايه .. بيصالح ..
ابن الاصول .. قال .. حى ع الفلاح ..
لازم نقطع عرق .. و نسيّح دمه .. عشان نرتاح ..
و الحرب لسه دايره .. فيها .. ابن البندر و الفلاّح ..
و ابن الاصول قال .. ايدك ف ايدى .. يا بن العم ..
حى ع الكفاح ..
نهدم عشوش الارهاب .. و نخليها .. سداح مداح ..
دى محاربة .. عدو الله .. شىء طيب مباح ..
لجل يرجع نهارنا .. كلّه .. سعاده و انشراح ..
و ليلنا يسهر .. مع القمر .. و يغنى مع .. الطير الصدّاح ..
.............
عزة احمد
