جارى التحميل
استخدم زر ESC أو رجوع للعودة
فى حب مصر :
إلى مصر .. وكل من عشقها .. وأحبها ..
إلى الحاقدين .. وكل من يحاول أن يكسر قلبها ..!!
هذه هى قصيدتى العاشرة : ........ أنا وأنت بنحبها ..!!
10- أنا وأنت بنحبها ..!!
أنا وأنت بنحبها .. أيه الدليل على كدا ..
لو قلبى على قلبها .. يبقى نلبى الندا ..
لو كنت بتحبها .. مستنى أيه .. قوللها ..
أمسح دموع بتسيل .. م القلب على خدها ..
مد لها أيدك شيل .. من همها وحملها ..
أسحب بساط الليل .. وأنشلها من ذلها ..
خضر غيطان الخير .. ف جبلها أو سهلها ..
أنا وأنت بنحبها .. أيه الدليل على كدا ..!!
********
أحلم معايا الحلم .. يولد أحلام كتيرة..
وأسعى معايا .. الهم وصعاب مرة كبيرة ..
بسرعة راح تتلم .. والمستحيل هنطوله ..
لما الأيادى تضم .. العود هيفرد طوله ..
وكل شئ هننوله .. ده مش كلام بنقوله ..
شوفوا تاريخنا زمان .. المجد بأصوله ..
أنا وأنت بنحبها .. أيه الدليل على كدا ..!!
********
أثبت يامصرى جدارتك .. ياللى صبرت كتير ..
آن الآوان بأرادتك ... تحفر سبيل الخير ..
تبنى لفوق بنيان .. أنوار ف كل مكان ..
آن الآوان يازمان .. والبركة ف الشبان ..
أنا وأنت بنحبها .. والحب نور وأمان ..
وبقلبى وبقلبها .. وبقدرة الرحمان ..
راح تعلا مصر لفوق .. والعزة للعرقان ..
أنا وأنت بنحبها .. وأدى الدليل على كدا ..!!
د. محسن الشرقاوى
ومازال للحب بقية ..!!
ومازال للشعر بقية ..!!
