الشاعر الكبير//مصطفى محمود ابو ابراهيم
تعظيم سلام بإحترام
للى حكمونا
وضحكه تملى العين
للى قتلونا
ممنوع كمان الدموع
تحرم كدا علينا
بحر الدموع أتقفل
تاهت أسامينا
كان لى بس سؤال
ومعاه كام كلمه
مش قولتو الثوره قامت
وحلفتو والنعمه
وبكره جى تمام
ياخساره كان جمعة
قتل وضرب وسحل
وضرب بالصرمه
الشكوى مره أوى
أشكى يارب لمين
أن كان ع العسكر
مع الدقون حلوين
ياعينى على اللى أتقتل
واللى حلف بيمين
لعبة كراسى الحكم
لعبه لكن على مين
ربك على المفترى
أشكى أنا لله
مصرى بسيط ياقوى
والأمن فين نلقاه
حتى رغيف العيش
لساه بنستناه
نقف طابور ومعاه
نضحك كمان نشكر
تعظيم كمان إرسال
لدولة العسكر
ركوع كمان للمشايخ
ياريت بأه نفكر
مين السبب فى القتل
ده سؤال مش أكتر
الشعب بيقول آه
على مصر حبيبتنا
الثورة قامت صحيح
ولا خلاص موتنا
مين السبب ياخلق
فى خراب بيتنا
فى ناس تقول المشايخ
أيوه معاها الحل
وناس تقول العسكر
كمان معاها فِل
وناس تقول القدر
معاه كمان مكتوب
الكل يشتم بعض
غالب مع مغلوب
وشعب شبعان غلب
وقلوب كمان بتدوب
قولولى مين السبب
فى اللى جرى لينا
فاتت سنه ونص
تاهت أمانينا
ومين معاه الحل
ومين يعدينا
ومين يقول يامصر
حقك علينا
قولولى مين السبب
أنا اصلى على قدى
لا علام ولا فكر
وأسمى كمان مهدى
سلام وألف شكر
لا حد جاوبنى
أبكى أنا يامصر
وأشرب أنا دمعى
الأسم مهدى صحيح
لكن ياناس مصرى
ومصر بيتى أنا
وفى دمى بتجرى...
الشاعر المبدع//مصطفى محمود ابو ابراهيم
