جارى التحميل
استخدم زر ESC أو رجوع للعودة
الشاعر الكبير//مصطفى محمود ابو ابراهيم
تعبنا يابلدى من الحكام
طنطاوى يحلف كله تمام
إخوان تقول الكرسى بكام
من كُهن عسكر والإخوان
كله بيلعب على كله
والشعب يبكى من غلبه
ويشكى دايماً للرحمن
ومهما كان الصوت مخنوء
بكره الشعب كمان هايفوء
مصر حبيبتى أكيد هاتروء
وتعودى يابلادى هنيه
أموت وعاشق الحريه
ومصر روحى وعنيا
أوعاك يامصرى تكون زهقان
أوعى تصدق يوم إخوان
كله بيرضى الأمريكان
عاوزينا شعب يكون بلجام
مفيش كرامه مفيش إنسان
لكن المهم الكرسى يبان
كله بيلعب الكنكان
شفت فى مره قيادى إخوان
مجروح ودمه منه يبان
لكن فى بيته نايم فرحان
الكل واقف ورا ستار
والشعب دمه صبح أنهار
ويامجلس العسكر فينك
فى الكدب ليك برضو منابك
الشعب بيقولك مالك
خلتنا نلعن أيامك
عينى عليكو يا سلفيين
أصل السياسه مفهاش دين
ايام زمان كانوا صادقين
شفتو حازم ابو اسماعيل
لو كان صحيح قائد للدين
كان قال يامصر فداك العين
فينك يا أزهر ساكت ليه
وفين مشايخك تايهين ليه
ياريت تقولنا نعمل ايه
وليه سكوتك طول ليه
كله بيضحك على كله
والشعب عارف مين ضده
عارف كمان مين بيحبه
واللى بيجى على شعبه
ربك بياخده ويحاسبه
ومهما كان الصوت مخنوء
بكره الشعب كمان هايفوء
مصر حبيبتى أكيد هاتروء
وتعودى يابلادى هنيه
أموت وعاشق الحريه
ومصر روحى وعنيا...
الشاعر المبدع//مصطفى محمود ابو ابراهيم
4أعجبني · · المشاركة
المصدر: sabertwky
المبدعــــون الشبــــاب//للشاعر صابر الطوخى
