فين الجمل إيه العمل

قول يا زمن قبل ما نرحل

فين الجمل راح الأمل

ليه الندم وليه أزعل

لو كان صحيح مات الجمل

فين جثته فين محمله

يبأه الشهيد محتمل


يكون غريق أو متهم


والعدل مات أيوه إتقهر


من غير جنازه إتعدم


مكتوب علينا خطوتين


خطوه حزينه تبكى بآنين


والتانيه تشكى لربها


الشعب راضى يقول آمين


ماهو شعب كله شحاتين


أول حصاد السنين


وهديه حلوه يا بياعين


ونهاية آسيه لل100 يوم


وبيسألوه الفرح فين


رد عليهم الزعيم


تكبير ... الله أكبر


تكبير .... الثوره تخسر


وبراءه لكل المذنبين


والقاتل أصله هو مين


ايوه أنا وانته الآمين


ماخلاص شبعنا يا كدابين


والقصة توته وإنتهت


حتى الستاره أختفت


ومعاها أكبر فنانين


وكراسى بلا متفرجين


مسرح كبير


تكبير ... الله أكبر


تكبير .... الثوره تخسر


أصل الجمل من غير صنم


صنمنا إحنا بنعبده


زرعنا خوف وبنحصده


ضحكو علينا بالدقون


ماخلاص يامصر راح يهون


الغالى قبل الرخيص


الكل حالف راح يخون


أكبر مافيك يابلد


الذل وارثه للابد


يسقينا إحنا والولد


حره يامصر للكبير


لمعالى دولة الوزير


وياعينى ع الشعب الفقير


تكبير ... الله اكبر


تكبير ... الثوره تخسر


ولا نطول ولا نقصر


يدوب قلوبنا تتحسر


ننام بكدبه نعشقها


ونصحى لكدبه نشتاقها


ومصر ناس بتسرقها


عليك يارب تحرسها


تكبير ... الله أكبر


تكبير ... الله أكبر

تكبير ... الله أكبر
-----------------------
مصطفى محمود أبوإبراهيمـ

خطوط الطول تتقسمـ

دموع وآهات

مدارها حار ويتبسمـ

بمر سكات

خطوطها واخده خطاوينا

بتطويها بلون الذات

وعاشقه لكل آسامينا

وطالبه حالات

حاله يوم تضحكنا

وحالة نوح لحد ممات

وحاله ايوه رحاله

وواخدانا لدواير العرض

دواير العرض مداريه

بتأسى علينا وقويه

وتسقينا نار البعد

وعرض فى بحر أحلامنا

يحاربنا بنار السهد

ويسرق احلى مافينا

ما يستر عرض

يعشش البكى علينا

ونارنا حاصده أمانينا

بدواير..عرض

شبعنا ..غلب

مافى غير طريق واحد

نقول يارب ....نقول يارب

-----------------

مصطفى محمود أبوإبراهيمـ