ليه ياقلم رافض الكلام

أوعي تقول حبرك خلص

أوعي تقول عزمك نقص

ودي بداية الاستسلام

خليك ياقلم واقف لهم

شاهد عيان علي ظلمهم

وأصرخ كمان في وشهم

صرخة تغني عن الكلام

أوعي سِنك ينكسر

أوعي حبرك يتعصر

أوعاك تحس بالإنهزام

قول ياقلم أوعي تخاف

عمرك ماكنت جبان , خواف

وأوعي تسكت وألا تنام

هيعملولك إيه

سنك هيكسروه

لو ألف مرة إحنا نبريه

بس ماتبطلش كلام

أنطق وقول وأحفر حروفك

إياك تحسسهم بخوفك

لسه مرارة ظلمهم

جوه حلقك .. جوه جوفك

وأوعي تقول تعظيم سلام

لو حتى حكموا بالإعدام

هتفضل حروفك طلقات رصاص

جوه الكتاب جوه الكراس

أوعي تكتم تاني كلام

سجل ياقلم وأكتب كتير

قصص فسادهم والتزوير

أكتب .. أرسم .. أنطق . قول

عن اللي عملوه الفلول

أحكي حكاية بلد أتسرق

بأيد اللي عنها كان مسئول

أكتب وسجل للتاريخ

أرصد لبكره كل تاريخ

أتلوثت فيه أيديهم

بدم طفل ودم شيخ

قوم تاني وأكتب ياقلم

أحكي عن شعب أتظلم

أحكي للدنيا الحكاية

من البداية للنهاية

ع اللي من حقه أتحرم

ع اللي داسه الظلم وفرم

واللي قال قولة حق

وبسببها ياناس أتعدم

ع اللي منعوا عنه الدوا

لما مات من الألم

أحكي وأكتب قول وسجل

قبل ماتشرب كاس الندم

أوعي تاني في يوم تسَلِم

أكتب ياقلم قول وأتكلم

إياك تعلن الإستسلام

أكتب وخلي ياقلم حروفك

تبقي أقوي من كل خوفك

وتبقي رصاصة الإنتقام

وأكتب ياقلم

وأوعي ترفض تاني الكلام