جارى التحميل
استخدم زر ESC أو رجوع للعودة
-
الكاتب//احمد منصور//بالله عليكى يامصر قوليلى
بالله عليكِ يامصر قوليلي
أقول لأبني أيه
وهو شايف أبوه
عشان بيخلصلك بتمرمطيه
شايفه تعبان شقيان
وفي النهاية بتظلميه
قوليلي أقوله أيه
وهو شايف حق أبوه بيتسرق
وهو شايف أدام عينيه
ملايين الشباب
مش لاقيين حتي الجنيه
واللي منهم منك زهق
وحب يهرب بره أرضك
جوه بحر الموت غرق
لما أقوله أحترم استاذك
ويسمعك وأنتِ بتقوليله
أضرب دماغك في ألف حيط
وأتفلق
وأنا بأقوله اللي تعري جسمها
وباسم الفن تبيع نفسها
يابني حرام
ويطلع علينا رئيس البلد
يكذبني أدام أبني
ويقول عايز يعتذر للست الهام
يامصر بالله عليكِ أقوله أيه
أقوله يتعلم و يكبرعشان يفيدك
طيب ماهو شايف الحال
اللي أنا فيه
أقوله بقي ذاكر ليه
عشان يقولي أن زميله
الفاشل بالغش
طلع الأول عليه
قوليلي أزاي أحفزه
وأقوله أطلع مدرس
وألا دكتور أو مهندس
وهو شايف الجاهل
أزاي أنتِ بترفعيه
أقوله أيه
لما شافني مهتم أوي وبجدية
وباجهز نفسي لمسابقة
هتكون بعديها ترقية
وأرجع منها والحزن باين عليّ
يقولي أيه اللي حصل
أقوله طلعت تمثيلية
كانوا مختارين واحد
وعاملين مسابقة صورية
وأحنا كنا بيه ستة
ولو رتبناه وسطينا
يطلع ال100
طلع الأول علينا
وهو الفاشل اللي فينا
بس لو في مسابقة حقيقية
أقوله أيه لما شاف ابن عمه
من كتر تعبه في المذاكرة
كان أبني حامل همه
ونجح وطلع م الأوائل
وكان بيجاوب أي سائل
وفين وفين لما قرا
إعلان عن وظيفة
راح بسرعة وكله أمل
وبعد السنين واللي اتعمل
وتقديرالامتياز
قال أكيد هتكون بتاعتي
وادخل الامتحان واجتاز
وبعد ظهور النتيجة
رجع ياعيني وكان متغاظ
اللي فاز بيها فاشل
تامر بن الاستاذ ممتاز
اللي جايب تقدير مقبول
عشان أبوه عارف المسئول
ودفع وخلص في الإنجاز
أقوله أيييييييييييييييييييييييييييه
ع الرشوة وألا الوساطة
وألا الفساد
أقوله أيه ع البطالة والبلطجة
واللي بيخون البلاد
أقوله أيييييييييييييييييييييييييييه
وأنا حاجة أعلمهاله
تعملي عكسها
أكلمه ع المبادئ
يلاقيكِ واقفة ضدها
أقوله أيه وألا أيه وألا أيه
أزاي أقوله دي أم
الحضن الكبير اللي بيضم
ونفسي يابني تحبها
وأنا جوه قلبي كره ليكِ
من سنين الظلم
مش هاقدر خلاص أضحك عليه
لو أنتِ عندك حاجة تقوليها
وألا كلمة تدافعي بيها
شوفي هتبرري الفساد بأيه
وهاسيبك بقي منك ليه
وهو حر يصدقك يكذبك
دلوقتي أنا مابقتش قادر
أحط عيني خلاص في عينيه
المصدر: صابر الطوخى
المبدعــــون الشبــــاب//للشاعر صابر الطوخى
