نفسى أصرخ
بعلو صوتى
وأقول آه يانى
يا أمى تعاليلى
لو كنتى سامعانى
الله يرحمك
دا اللى عايشين
ما عادوش سامعين
وإن سمعوا
مش فاهمين
حتى اللى فاهمها منهم
مصدر الطرشة
ومستنى منصب
أو هبشة
يا أولاد الحلال
حدش يقولى
هى الثورة تاهت
والا راحت فين؟
قالولى
دور عليها فى التحرير
ياتروح بنفسك
ياتجيب منادى
الفكرة عجبتنى
قولت ياهادى
وشديت رحالى
عا التحرير
مش ده اللى شوفته
فى القنوات
الناس عاملة زحمة كتيرة
زى الليلة الكبيرة
بتاعت جاهين
لف تشوف عجايب
مولد وصاحبه غايب
كل زمار
عامله شلة ومستنى
مستنى ياخد
من التورتة نايب
والشهدا؟؟؟
راحوا
وراح دمهم أونطة
تكونش الثورة
راحت لهم تواسيهم
فى العالم التانى
نفسى أصرخ
بعلو صوتى
واقول آه يانى
يا أمى تعاليلى
لوكنتى سامعانى
دا اللى عايشين
ماعادوش سامعين
حاولت أجمعهم
وأفهمهم
باردو مش فاهمين
بالعربى مش عايزين
*****
ياناس الثورة نظام
الغرض منه
تلات أهداف
لشعبنا نحققها
شعبنا اللى اتظلم
واتحرم سنين تلاتين
*****
سيبكم بقى من الأنا
وخلوا عملكم لكلنا
أيه يعنى لما نبدأ تانى
من هنا
ومن اللحظة دى
نقول اتولدنا كلنا
وماعادش مين اللى ثار
قبل مين
وده فلول
وده إخوان مسلمين
قبطى...مسلم...علمانى
بطريقة واحدة
تعالوا نحب مصرنا
من تانى
وبلاش الأنا
ماحدش يستنى حاجة
حتى اللى حاسس
انه اتظلم
أوماخدش حاجة
باردو يدى
وماينتظرش انه ياخد
مش لازم تسيطر
وتتصدر
علشان فى الصورة تظهر
يقنها أمك
اللى محتاجالك
هوا إنت لازم تحسس الناس
انك بتساعد أمك
أمك اللى محتاجالك
أنا راضى زمتكم
هوا الكلام ده صعب يتفهم
نفسي أصرخ وأقول
يقنها أمك
ولوكنت لسة
مش فاهم
باردون
انكسف بقى على دمك

"تأليف: م. الصياد"