جارى التحميل
استخدم زر ESC أو رجوع للعودة
الكاتب//احمد منصور
ياللي رايح ياللي جاي
واحدة أتخطفت
مااعرفش أزاي
كانت هنا .. وسطنا
لمانا حوالين صينية شاي
قاعدة تحكي مجدها
تاريخ . حضارة مين أدها
7
آلاف من السنين
رافعة راسها مين زيها
قعدت تحكي عن نهرها
اللي بيسقي أرضها
حكت لنا عن ولادها
قالت جمال قالت السادات
باين عليها بتحبهم
حكت كتير عنهم حكايات
وقالت كمان أسماء كتير
كل اسم وليه بطولات
فجأة سكتت وسكتتنا
نزلت دموع منها وجعتنا
قلنالها مالك .. مالهم عيالك
رفعت عيونها الحزنانين
بالحزن كانوا مليانين
سامحوني دمعي
دا غصب عني
أصل لي ابن خاني
كنت فاكراه حتة مني
ذلني .. باعني .. وهانّي
كنت فاكراه بيحبني
لما كان باسمي يغني
ونزلت تاني دموع عينيها
من الحزن اللي كان كاويها
قلنالها اهدي ماتزعليش
كفاية بُكي مايهمكيش
شوفت منه أسي كتير
كنت فاكراه ابني الكبير
قليلنا طيب فين مكانه
وأوعي نشوف دمعك عشانه
واحنا حنجيبهولك هنا
وآه ياويله مننا
وإحنا بعد اللي حكتيه
ياريتك كنتِ أمنا
وهنجيبه لو غطسان في بير
دا مستخبي عند صاحبه
بيقولوا انه اسمه المشير
ونزلت تاني دموع عينيها
معذورة م الحزن اللي فيها
قلبها كان واجعها
قالت آه ياحسرتي
خسارة فيه تربيتي
هي دي تكون آخرتي
ابني يطلع رئيس عصابة
ابني يسرق دم الغلابة
بادعي عليه صبح وليل
حسبي الله ومنعم الوكيل
غضبانه عليك من جوه قلبي
وبادعي يخلص حقي ربي
ماتزعليش ياست الكل
دا أنت أم زي الفل
وعادي لما واحد يخون
ماهي ياما بتجيب البطون
وأكيد عندك ولاد تانيين
عندي يابني بالملايين
فجاة وهي قاعدة بينا
بنسمع لها وبتحكي لنا
دخل علينا بالسلاح
وراح خاطفة من وسطنا
نعمل إيه ماهو سفاح
سهل عليه دمنا
وطبعاً كانوا ملثمين
بس من صوتهم معروفين
قعدت تصرخ ألحقوني
قولوا لولادي ينقذوني
والناس كانت مستغربة
فين ولادك ياطيبة
خرجنا ننادي علي ولادها
روحوا ادفعوا يالا ديتها
بس كانوا مشغولين
بالتركة كانوا ملخومين
والخيبة بقت ياعيني تقيلة
كل واحد من عيالها
عايز يبقي كبير العيلة
وكلهم متفرقين
والحرامية فرحانين
وحتي وهي هناك مخطوفة
زعلانة علي ولادها وملهوفة
وهم لسة مش سامعين
طيب امتي هتلحقوها
ولحد امتي هتسيبوها
للحرامية يمرمطوها
وانتم كده واقفين ساكتين
قوموا يالا اهجموا عليه
وخلصوها من أيديه
وامسكوه وكتفوه
وفي التحرير وأعدموه
الكاتب//احمد منصور
المصدر: sabertwky
المبدعــــون الشبــــاب//للشاعر صابر الطوخى
