أختي وأخويا شمسي وقمري نورعيني اللي بشوف بيها
أختي وأخويا يعني ريحة الحبايب أمي وأبويا
أختي وأخويا يعني فرحة وبسمة قسمناها سوا يعني لحظة ألم تعبنا منها سوا 
أختي وأخويا يعني سهراية تحت القمر فيها حكاوي زمان يعني حضن أمن وأمان
يعني سند وضهر يعني عزوفخر يعني لحظة شوق وحنان
أختي وأخويا يعني توب يسترك وقت الحاجة ولقمة تسد جوعك لو محتاج يعني شربة مية باردة في يوم حر في صيف
أختي وأخويا يعني دفا في ليل بارد في شتا يعني نسمة عبير في صيف يعني دعوة في جوف الليل ليك يعني لحظة وصل في يوم جفا
أختي وأخويا يعني لما أغيب ألاقي أم وأب لولادي يعني يحسسوني أني مش في الدنيا لوحدي وإن في ناس يهمهم أمري 
أختي وأخويا يعني دم واحد ولحم واحد يعني تفكيري تفكيرهم وهمي همهم يعني الهم واحد والفرح واحد
أختي وأخويا يعني كل واحد مننا نفسه التاني يكون أحسن منه يعني حد يحس بالوجع اللي فيك يعني حد يفرح وهومش عارف فرحان ليه بس فرحان عشان شايفك مبسوط أمام عينه
أختي وأخويا يعني أيام وذكريات يعني أمال وأحلام يعني لعب وضحك وجد يعني حب ملوش حد يعني حد يفتكرك بعد ماتموت ويدعيلك بإخلاص
أختي وأخويا يعني روح واحدة أنا وهما مفيش دنيا ولاحد يعرف يفرقنا أوعى تفرط في أختك أو أخوك