ماهر أبو المعاطى

ثورة من جديد
.......................
أنا والحيرة والأوهام صحاب من يوم الولادة
نخبى حقيقة فى الأحلام عايشين وهم السعادة
وتيجى الدنيا وتروح
تفرحنا .. كتير تجرح
بتمنع .. والقليل تسمح
شمال ويمين وبتمرجح
وباطوح
أتوه فى الوهم .. سنين أسرح
وأقول لقلبى نفسى أفرح
يجوز تسمح .. يسوق فى العند بزيادة
ماهى عادة
وجتة شعب بتحنس
وتقفل عالحقوق محبس
وقمم منه وبفلفص
على زنزانة وشهادة
وشعب يفور
شعب يثور
يهد السور
وحكامه عايشه فى بلادة
..................................
ياكل هم فى البلد سببه السياسة
اللى شاخ واللى لسه هيتولد
غرقان لشوشته فى النجاسة
حتى أنا اللى دايماً بلوم
على النهاردة ويا بكره وكل يوم
أنا الملوم
وأنا اللى زارع جبل هموم
وأنا اللى حلمى من الطفولة للكبر
أطول النجوم
وأنا اللى قام والكل راقد
وأنا اللى راقد ونفسى أقوم
وأنا اللى قد القول
فى وش أذناب الفلول
بلعن مبارك فى عز مجده
وكنت قده .. والله قده
وأنا الضعيف
ماهو عشان ترد المظالم
تقف أسد فى وش ظالم
والحرف سيف .... يادى الخريف
أرحل بقى
أفتح لمصر الشرنقة
نفسى ومعايا الجميع
أشوف فى يوم زهر الربيع
فين الربيع
أصبح صريع
وعينى شايفه فى الصفوف
أول صفوف لا حبذا
القاتل وبكل فُجر واقف وبياخد العزا
.....................................
مش دى أساس المشكلة دا المعضلة
الجميع واقف موافق عالمهزلة
يادى البلا
يا كل باشا وكل بيه
يا كل مشتاق للمريسة
الدنيا أكبر مدرسة
والعِبرة سورة الزلزلة
..................................
الثورة تايهة فى البلد وتاه الولد
واللى واقف بين وبين
عامل رزين
وهو واقف عالحدود
عامل حدود
بانى سدود
كل كلامه عالحياد
قاعد بيخدع فى العباد
متعمد بميه فساد
مستنى مركب تهدا حبه ولا ترسى
يمكن ينوبه فى الزحمه كرسى
من غير سبب ولا بسبب
يلعن فى مرسى
دلوقتى قوله مين رئيسى
طبعاً يا سيسى
استاذ فى تضليل النفوس
وكل حاجه بالفلوس
مايعرفش حاجه عن القرف
يبيع الكرامة والشرف
اهو شئ من فصيلة التيوس
نازل سباب فى كل باب
وكله فى ثورة يناير
يقول دى وكسه
لأ لأ دى نكسة
وضميرى قاله.. أخرس يا واطى
خليك متطاطى
المجد ليونيو ويناير
فى الأتنين الشعب ثاير
وأنت واخد على لحس النعال
عايش حياتك مزبلة
تشبه رجالنا بالعيال
وتوجد حلول للمشكلة
وكله لعب بالقانون
مرسومة عليك أوى
كل كلمة جوا سورة المنافقون
........................................
ما احنا شعب عايشين للأسف وسط غابة
الملايين فى ليل حزين غرقانين فى بحور كآبة
والملايين متستفين جوا فى بنوك الديابة
مُرة القصيدة والحرف واقف جوا فى حلق الكتابة
يا ألف حسرة عالغلابة
..............................
كمل جميلك ..أحمى أرضك أحمى نيلك
ما فيشس جميل
مابين جنود وقائد أصيل
لازم وواجب
وحده يتحمل متاعب حق الدفاع
مش هو برضو وزير دفاع
أبعد الجيش عن الصراع
أنت واخد عالصعاب
وأهدى للشعب المتاع
والثورة مقسومة علينا بالتمام
بينا وبينك
فى التضحية ولا النضال حتى الكلام
أنت جيش وأحنا شعب
أنت عقل وأحنا قلب
جربنا تحكمنا العقول
إن كان دا عسكر ولا مرشد أو فلول
آن الآوان يحكمنا قلب
يعرف يحب
وإن كان على واجبك جوا عينى طول الزمن
ومافيش مقاتل وقت الحروب يطلب من شعبه التمن
مش تيجى ثورة تعمل رئيس شكل ومظاهر
يطلع يقول الثورة عورة يعملنا قانون تظاهر
....................................
هى الحكاية لعبة كراسى
ما أنت راسى
تمشى الفلول يجى مرشد
يمشى مرشد يجى الفلول
من غير ما احلف ولا أقول
لو جالى واحد من بتوع موافقون
منافقون بتوع زمان
هنعيد كل اللى كان
ولا جه حبيب ولا جمال ولا عز بتاع الحديد
خليك رشيد
النار هتعلى وتبقى ثورة من جديد
هتمحى كل الوشوش
اللى راسمه ضحكه صفرا
وهما من جوا وحوش
اللى واخدين على عز العروش
اللى فاكرين ثورتنا فشوش
لوشعب قام قلى مين يقدر يحوش
لوشعب قام قلى مين يقدر يحوش