حلـــــم بسيــــط
****************
أنا السهران
زي الفراشات ع قنديلك
بأحرس في عينيكي النور
=======
أنا العطشان
بشربة واحدة من نيلك
يكون قلبي قمر مسحور
=======
أنا العشقان
وطين الأرض يحكيلك
عن العشق اللي في طيني
وعشقك إنتي تكويني
وعشقك لسه
بيحرقني ... ويكويني
بيغلي إف كل شراييني
كما التنور
=======
أنا النعسان على حجرك
تغنيلي مواويلك
وأنام أحلم أنا بفجرك
وأصرخ لما حيجيلك :
(( أنا إنسان ))
بقالي زمان
ذليل مقهور
=======
صحيت فرحان
وطرت أنا فوق أناديلك
ما أنا الحارس ع قناديلك
ورحت أرسم بحنية ...
حروف اسمك
لمحت نهار يناديلك
يبدد في ظلام ليلك
وعن جسمك ...
يفك الطوق
ترفرفي فوق ...
بحرية
يرفرف قلبي وياكي
زي العصفور
=======
وبعد زمان
رماني الشوق ...
ع ضفة من ضفاف نيلك
رميت نفسي أنا إف حضنك
عشان أبكي من الفرحة وأشكيلك
لمحت الفرحة في حزنك
ولمحت أنا ضهرك المحني
رجع قلبي حزين مكسور
=======
أنا مش فارس الفرسان
" دا أنا غلبان "
وحلمي بسيط
كفاية إني
أبات مستور
=======
أنا الشقيان
بزرع الغيط
وحلمي بردوا لسه بسيط
لقمة عيش ...
وجلابية قماش " كستور "
=======
أنا الغرقان بأحلامك
وحلمك إنتي بردوا بسيط
وأنا رافع لأعلامك
بأحس كإني جوه محيط
وإنتي بتصرخي فيا
بأسمع صوتك المقهور :

(( يلا أصرخ " يا حرية "))
ولما أصرخ
يغمر قلبي كله شعور
بإني بأعشقك وحدي
ولا قبلي ... ولا بعدي
حد بيعشقك قدي
ولما أغني " يا بلدي "
تلف الدنيا بيا تدور
=======
وحأفضل بردوا أنا الإنسان
أنا السهران ... أنا العشقان
أنا الغلبان ... أنا الشقيان
أنا الغرقان ... وأنا بأحلم
بشمسنا طالعة م الدستور