(( قصيدة عشق ))
صعب إني أحـب غيــرك
صعب أنسي إنـي طيرك
صعب أنسي إنك سبتي
قلبي يوم يــــروح لغيرك

صعب عليا أشوف عينها
لأني بس بأشوف عيونك
حتي في لمسة إيــديها
بأحس إني بقيت بأخونك

قولت مــرة وألف مـرة
قلبي مش زي القلوب
وإنتي لو صدقتي مـرة
كنتِ قولتِ إني أيــوب

صبرت وصبري طال سنين
بكيت وقلبي عاش حــزين
مّـديت إيــديــا ليكِ أخــدك
رفضتِ قلبي ومعاه الحنين

حبي ليكِ لساه وعــايش
كل يـــوم جـــوايا يــزيد
علشانك إنتي بس عايش
ياللي حبك في الــوريد
طمعان يحن قلبك ونرجــع
عصفورين في قفص حديد

أخـــر مـــرة راح أقــولك
الحب صعب إنــه يمـوت
إنتي شمسي وقلبي ضلك
إنتي كلامي وإنتي السكوت

مليون تحية من غير وداع
لأني ماعرفش المستحيل
مش هأقول حب وضــــاع
كل نهـــــار وأخــــره ليل

الحكاية مش إني بأكتب
قصيدة عشق كلها أحزان
الحكاية قلبي وعُــــرفه
إنه حقيقي قلب إنسان

نفسه يتهني بحببته
قبل ما يفـــوت الآوان
قبل ما يبقي كان وكٌنا
قبل ما يبقي كٌنا وكان

والسلام هايكون ختــام
وبعده منه مفيش كـلام