‏

فاكر جنابك
ب رفعه صباعك
صاحبك هيرجع ؟!
ايه بس
اللي نابك ؟!
اوعي تفكر
اني اقدر
يفرحني عذابك
ده انت صاحبي
وانت اخويا
واسمك عارفه
امي وابويا
وسالوني كتير عليك
وبيقولولي :
هو ليه مبيتصلش بيك ؟
اوعي تكون سبته ؟
ولا يكون هو اللي سابك ؟!!!
رد قولي ؟
اقولهم ايه ؟
اصل ردي
مش لاقيه
ولما عيني بان
فيها الدموع
ابويا قالي
ايه الموضوع ؟
قولتله ف الاراء مختلفين
والاختلاف خلانا متفرقين
وبعد ما كنا واحد
للاسف ...بقينا اتنين
لا هو عايز يفهمني
ولا انا عارف افهمه
ويهرب مني
لما اجي واكلمه
بس ....
وحشاني لمتنا
وخناقتنا علي بنت حتتنا
متفرقين مع انها
واحده سكتنا
طبطب ابويا علي كتفي
وحضني
وقالي كلام عاوز بيه
يطمني
قالي :
هي غمه ايوه غمه
وهتعدي وبكرة تشوف
اصل يا ابني احنا امه
مبتعرفش معني الخوف
وروح لصاحبك كلمه
وان عاندك ... اعزمه
ع الغدا زي زمان
قوله الدعوه مش باسمك
دي باسم اننا انساااااااان

سيد صادق