بدون كسوف
كلمات \ سـحـر جمـال حبـيـب ..

خليني ألمح
فى العيون
نظرة رضا
ويحسّها ..
قلبي الجريح
حا القاه قوام
حس بدفا
نظرة وحيدة .. لكنما
فيها الحياه
و مطرطشه
حوالين دموع
بسمة شفا
راح تشفي قلبى
اللي انجرح
و اللي اندبح
و اللي .. ماحس فـــ عمره يوم
لحظة فرح
جواه شجن
خارجة الآهات
تصرخ تزلزل دنيتى
و الصرخة وياها الدموع ..
صوتها النشاز .
عالخد نازله مشرّخه
سطح الإزاز
وتعودلى من تانى الدموع
تسقط .. تطفى فى الشموع
طب باقية لية ... بعد الفرح ؟!
و معاها مات
برعم وكان
مولود جديد
عمره يادوب
حبة ساعات
نازل عجوز
متكرمش الوش الجليد
الزرعه من قلبى انا
و حصدت منها اللى اتكتب
محصولي كان
حزنى الكبير .. اللي عاشقنى
بدون كسوف
فى حياتي ماكانليش مكان
يا خسارة الفرح اللى كان
دنا لسة كنت بجربه ..
بضحك ونفسى اتشرّبه
و قلت اعيش ...
فجأة لقيت متكتفه
لبست طرحة مستفه..
من تحتها كل العذاب
الفرح غاب
ومعادش تانى يهزنى
لون الفرح
لونها الجميل راح واتكسى ..
بــــ ليل السواد
اه ع الحنين ..
لما يموت ...
و بموت معاه
و صك موت بين الايدين
ماعرفش ايه سبب الوفاة ..