ايه اللي فيكي يادنيا متغير
ولا أنا اللي شكلي غريب
عايش فيكي لوحدي متحير
لا بقي لي فيكي صاحب
ولا بقي لي فيكي حبيب
ايه اللي فيكي يادنيا متغير
ولا أنا اللي فيكي نشاذ
بعزف علي وتر قلبي
لحن قصتي وحبي
ولا حد يسمع ولا يشجع
خايف ليقولوا عليه منحاذ
ايه اللي فيكي يادنيا متغير
ولا أنا اللي راحت عليا خلاص
لا عاد الزمن زمني
ولا عاد فيه في الناس اخلاص
ايه اللي فيكي يادنيا متغير
ولا أنا اللي فيكي بقيت شاذ
الكل فيكي من بعض بيقرب
وأنا اللي بقيت فيكي منداس
ايه اللي فيكي يادنيا متغير
ولا أنا ما عاد لي قرار
طول عمري فيكي مصير
وعمر ما كان لي خيار
ايه فيكي يادنيا متغير
ليه الناس شبهه بعض
وأنا اللي فيكي لوحدي
فريده ما بشبهه حد
أمانه عليكي يادنيا تقولي بجد
علشان هما جيل واحد
وأنا جيل تاني غير جيلهم
ولا علشان طبعهم واحد
وأنا طبيعي مش منهم
ولوني كمان يادنيا غير لونهم
ايه اللي فيكي يادنيا متغير
ولا أنا اللي فيكي عبيط
كنت متعشم فيكي الطيبه
أتاريكي عايزه قلب حديد
أوعدك يادنيا ان من النهارده
راح يكون لي قلب جديد
هابدل قلبي الدهب بقلب حديد
لاجل ما أبقي تاني فيكي وحيد
وراح أتغير زي انتٍ ماتغيرتي
وكل يوم هاكون لكٍ بلون جديد
ما أنا غلبت فيكي يادنيا
وغلبت .. أقول ياناس
أنا . أنا انسان حساس
وما عاد لي مكان بينكم
ولا هاسمح في يوم انداس
دا انا كنت زمان ايدي بتنباس
كفايه بقي ارحموني
كفايه ارحموني ياناس

صفاء عبد ربه