لمّا توصل بالسلامة

هاتلنا ربطة مشبّك

وابقى حاسب ع المشنة

واربط المخلة وشّـبِّـك

...

كانت امى تقولى دايما

خلى بالك م الطريق

خلى بالك م السلاح

كانت امى لما تدعى

يبقى أصغر شىء براح

كنت بمشى وقلبى سايبه فى حجرها

وامّــا ع السلم تعيط

كنت بزعل مـنــّـها

...........

كنت بكدب لما بضحك ع السلالم

والسلالم عارفة انى مش راح ارجع

كنت بسمع ..

كل كلمة ع الحيطان بتشدنى

وتهزنى .. كلمة ضنايا

كنت بارمى الكون ورايا

وامشى اسرع

...

عارفة يا امّا ..

كل خطوة كنت بنزف قبل ما انزف ع الحدود

كنت بمسك فى الخطاوى

كنت حاسس بالجمود

وانتى صورتك مالية شبّاك المحطة

والرصيف بيقولى ارجع

كل شىء حواليّة خايف

كل شىء حوالية مكسور الشفايف

كل شىء ساكت بيسمع

وانتهت كل الحكاية عند شباك التذاكر

لما شفتِك بتقوليلى خلى بالك

خلى بالك لــمّا توصل

عند ربك افتكرنى

بلغه منى السلام

قوله أمى مش هتندم لما اروحلك

ابقى قول كل الكلام

لـمّـا توصل بالسلامة

ابقى قول كل الكلام