‏عادل بكر‏

جرح الوطن
.................
الدم لونى
وانا فيه دفين
والجرح دونى
ينزف انين
لو خيرونى
يموت الحنين
ويموت التلاقى
إيه تانى باقى
من احتراقى
غير شمعة واحدة
فى ليل حزين
عن بورما
باكتب وعن چِنين
وعن قبر أمة
للمسلمين
...
الانتماء
لو له وجود
انا فى العراء
بين الحدود
موجود ولكن
تحت المساكن
وحيد
طريد
وفى الخيام
مات الكلام
ومن بعيد
صوت الزئير
وبعد الخطاب
جابوا الكلاب
من لحمى تاكل
والروح تطير
فى اى اتجاه
عن حمص باكتب وعن حماه
وعن الحمير
...
لافيه تابوت
ولا فيه كفن
نموت نموت
ويحيا الوطن
بكل الآثار
وبكل الآبار
ويعيش الحمار
مدى الزمان
وفى الحجاز
نرجم شيطان
ونسيبه يمشى
ويجى الاباتشى
من أحدث طراز
للأمريكان
من فوق يفوت
وتحت السفن
نموت نموت
ويحيا الوطن
عن نفسى باكتب وعن الوطن
من الرباط حتى عدن
................
عادل بكر