‏ابو عمار المصري‏

لسانى رافض أصدق
كل اللى انا شايفه
مخى التخين
بقى عاصى على التفكير
شايل يقين
على كتافى من ميت سنة
إنى هنا ....وانت هنا
هو المكان نفس المكان
جوة خريطة قلبنا
مستنى ارس .
يدق ف جتتى مسمار
ما بين لحمى وبين عضمى
أعلق فيه صورة أمل
مستنى خيط ضل الضلام
يفصل مابين دمعى
وبين شوفى
من ألف عام ..ناسى أنا
ناسى الأنا ...ناسى الولد
كل اللى فاكره يا بلد
إزاى يروح خوفى
حتى الكلام فوق السطور
رافض باقى حروفى
بين كاف ونون كل المعانى اتجمدت
كل العقول
واقفة على حد الجنون
يا أمة .أم ....وكات حنون
إزاى تهون ؟....إزاى نخون ..؟
عهد اللقا بيكى
أنا اللى تايه بين لاءات
ترسم خطاويكى
من ميت سنة ...جدرى هنا
عاشق دفا عنيكى
نبضى الحزين ..برغم همى والجراح
راسم فى شريانه الضحكة
جايز تداويكى
وانام وعينى مفتحة
تحرس لياليكى
من إيه بخاف ؟
على إيه بخاف ؟
وانت الأمان ...بتطمنى
كل القلوب...لكن أنا ...هو أنا
قلبى الرهيف .والقلوق
على بكرة ف عنيكى
دايما بيسرح للمحال
إيه اللى راح يجرى ؟
لو قمت يوم من فرشتى
ما لقبتش حضنك ضمنى
يا غربتى
يا لوعتى
لو بس احس انك بعيد
إو إنك انت مش هنا
أو إنى جنبك مش أنا
من ميت سنة
خايف أنا
يصبح مكانك مش هنا
وابقى أنا ضايع فى ليلك يا أنا
تايه فى نيلك يا أنا
شارب مرار
فارش تراب
متغطى بغيوم السما
فين الإيمان بيكى ؟
يا مؤمنة ...يا مؤمنة

بقلم
أبــــو عـــمــــار الـــمــــصـــــــــــــــــر ى