البلطجى
*******
فى مصر شغلة بوسطجى
أو حتى شغلة مكوجى
لكن وظيفة بلطجى
ده هو بقى شغل الإجرام

يطلع وفاتح مطوته
على أى شخص ف سكته
يسرق فلوسه وشنطته
يرجع لبيته وماله حرام

أو واحدة رايحة لشغلها
يفتح سلاحه ف وشها
يخطف دهبها وابنها
ويتوه بهم وسط الزحام

ولا مرة حس بغلطته
لو واحدة زى جدته
باست إيديه ..اترجته
أصل اللى اخده مال ايتام

أو شاب ماشى بأسرته
يطلع عليه مع شلته
يخطف مراته ..يثبته
يرميه بقسوة ويجرى أوام

مين اللى موت نخوته
وفين ضميره وذمته
ده حسابه بكرة ف آخرته
عند اللى خلقه وعمره مانام

بقلمى الموجوع د.منال