<!-- / icon and title --><!-- message --> انا ليا مزاج
اكتب من غير ورقه وقلم
واسمع من غير تنغيم
ويكون لى ارض
وبيت
وعلم
اخرج بره مدار الكوكب
وابقى حدث
صاحبه اكتشاف
مذهل... خطير
ليا مزاج اتفرج من بعيد لبعيد
واقضى يوم خميس ف شباك
اشرب شاى
واستنا الدنيا تليل..
والهوا ياخدنى لهنا
وهناك
ليا مزاج ابص فى مريا
اتفرج على عيونى
واشوفنى من جديد
تخنت ؟؟
كبرت؟؟
يمكن احلويت؟
مش فارقه..انا لسه انا
ليا مزاج اركب عجله
بدالها يشبك ف بنطلوني
يتشحم
يتخربش
يتقطع
زى زمان...
وقلبى يبقى جوا ضلوعي فرحان
وليا مزاج اوى
انزل الحسين
والف فى الغوريه
واصلى لى ركعتين
فى كل زويه
فى كل حارة
وكل وش يقابلنى
يدعلى دعوتين
وليا مزاج اركب مينى باص6
الى بيروح كليه البنات
الاخضر ....الفاضى
واقعد جنب الشباك
اتفرج على البيوت
والوشوش
والوان الغسيل
فى البلكونات
ليا مزاج يكون لى مزاج
رايق
وصافى
وعال العال
وتنزل منى دمعتين
سخنين
مستحين
خيفين عليا من الشجن والحنين
ليا مزاج جديد
اكون مصدر سعاده
اكون مفيده بزياده
واستلف من الهوا حبت طراوه
يمكن حر اليوم يعدى
ويبعد بعيد...
وليا مزاج اعيشنى
ومضايقش
من اى رد
من حد صد
او يمكن بكلمه هد
حاجه حلوه
من حد قاسي..وحد ناسي
وحد تانى عامل عبيط!!
سارة ربيع
20/8/2007
نشرت فى 11 يناير 2008
بواسطة ozation
عدد زيارات الموقع
130,576
ساحة النقاش