يوم الجمعه ..زمان ده كان احلى الايام
اجازه ..وكل الناس فى البيت ولا مدراس ولا تعليم ولا واجب غلس ورخم وتقيل
والصبح فى الجمعه كان مختلف....عيدان بخور ماليه البيت قبل الصلاه
والشمس داخله من الشيش من بعد لبعيد ..تلسعنى حبه وتدفينى حبه
ده يوم الجمعه زمان كان زى يوم العيد..
الفطار الفاخر ..بكل الاصناف ذاخر
واللمه الحلوه...مع ان عددنا مش كبير
ده ماما و بابا و محمد وفطين
وانا طبعا ده شئ اكيد....
وبيسو القط السيامي الغلبان..الى كنت هاريه غلاسه وتنقيط
و لعبت معه كانه عروسه باربى ..او كائن عبيط...
وبعد الصلاه بشويا وهما راجعين...نتلم عيال صغيرين على القصب العملاق الفظيع ..
واسمع صوت ماما جاى من بعيد ..بكل لهجه تهديد..
"الى هايوقع على هدومه نهاره مش فايت" و "الى يبهدل السجاده يا ويله منى"
مع انها فى الاخر تضايق شويا وتقوم تلم ورانا من غير اى ضيق

الله ..على يوم الجمعه زمان

وساعات كتير كنا بعد الصلاه نروح النادي.....لو الجو حلو وصباح اليوم جميل وهادي
واللعب للركب والمراجيح ...والزوحلقه ام حديد ..احيانا احمر فى اصفر او متبيض لسه باخضر جديد..
وصحاب ماما وولدهم ..وناس كتير..وحواديت ورا حواديت
وساعات كنا نطلع فايد...ويبقى وقت الرجوع من هناك احساسه سخيف وفاسد...
اصل بعد بكره مدرسه ..وده بصراحه مكنش شئ سعيد..

ده يوم الجمعه زمان كان يوم عيد

ويضلم بسرعه ..ويخلص زى كل حاجه حلوه وقتها قصير..
وماما تكوى وتحضر للى عنده السبت مدارس
واغيظ فى اخواتى ما انا اجازه بقى السبت ....والغلاسه تنعكس السبت بالليل
اصلهم اجازه الاحد...وان ابقى عندي تعليم ..

وبقيت دلوقتى كل جمعه الصبح ...افتكر جمعه زمان

واترحم على الاموات...وازعل على الوقت الى عدا وفات

بس انا ناويه لما يبقى لى عيله جديده كتطور انسانى طبيعى

هاخلى كل ايامي زى يوم الجمعه زمان..

اوعدكم

ده شئ اكيد



سارة ربيع
7/6/2007