ما اقدرش انسى البشر

مـوجود على الأرض دم كـتير وله أصـحاب
ماشـيين على الأرض لسـه مانتهوش لتـراب
قاعـدين على البـرش لسـه من ورا الأبـواب
لاهـديـن ورا القرش لسـه وبيطـولوه بعذاب
عـايشـين على الشمس والطين هما والأعشاب
عـاملين لترس المـكينه سيور من الأعصـاب
حـارقين فى فـرن القمينه عضـمهم أخشـاب
رايـحين وجـايين غـلابا مظـلومين أغراب

مـوجـود على الأرض دمـع كتير وله أسباب
فى عيـون مـرات الشـريد اللى شبكها وغاب
وف قلبها اللى الشـباب عجز فى قلبه وشـاب
وف صـحنها اللى صـبح بعد الحـكايه خراب
ودمـع بنت الطـريق صـادق مهـوش كداب
يبـكى طـريقها الطــويله وقـلة الأحـبـاب
يبـكى خطـاها الـذليله بين كـلاب وديــاب
يـكتب على الأرض للعـالـم أمـر حســاب
والأرض تشـهد على دمـوع طفل نام ع الباب
ودمعـة الطـفل م الحـرمـان بتمـلا كـتاب
كـلام عن العـدل بين الأبـريـاء وعتــاب

موجود على الأرض موت وجروح وشوك وخراب
جـنب الـزهـور والطـيور والمنظـر الـجذاب
جـنب الـخدود والنهـود وعـواطف الـعـزاب
مـوجـود جـنود مجرمين ناقصين قرون وأنياب
مسـتعبــدين أرضــنا ومنجسـين لاعـتـاب
مقـدرش أنسـى دا كـله واتـوه أنا فى شـعاب
مقـدرش أنسـى البشــر متـوزعين أســلاب
بين الحـرامـى دالاس وتشـرشـل النصــاب
واوصـف جمـال الغروب والشمس نازفة سحاب
مـلـزوم أحس بـألـم وانـزف قصــايد نـار
تضـحك لنا مـن بعيـد أيـام حـاتبقى شـبـاب