مسألة وقت
..........
مش دقايق؟
ولا أكتر ..
هوه فاضل
قد إيه؟
مسألة وقت
إللي بيننا ..
تقدري تتحمليه
ما الوداع
جاي في النهاية
تخسريني ..
وتكسبيه
..........
دمعة مالية
عينيكي لسة ..
واخدة قلبي
وراجعة بيه ..
بتداريها وإنتي
عارفة ..
هية غالية علية
ليه
يبقى بتعطلنا
حاجة
قولتي ضعف ..
وقولت وقت
حتى م
الإحساس دا
خايفة ..
ماتخافيش
ما أنا برضه
بعت
مسألة وقت
إللي بيننا ..
تقدري تتحمليه
ما الوداع ..
جاي
في النهاية
تخسريني ..
وتكسبيه
............
بتسألي ليه ع الوقت إللي فاضل في قصتنا؟ ما إنتي عارفة إنه أصبح قليل جدا ..وإن الساعة من وقت ماإختلفنا وجرحنا بعض وهان علينا حبنا ..أصبحت تجري بسرعة ..إتطمني هنتفارق ..مافيش داعي للقلق ..هية بس ..مسألة وقت
محمدعبدالرحيم
