خليك خفيف الشاعره ايمان سامح

#خليك_خفيف
كلنا انسان.... ضعيف
نازلين عليها زى ضيف
مين ضامن ساعه من عمره
ف خليك فى حالك خفيف.
خلى قلبك من جواه نضيف.
خليك زى طين اﻻرض
يتزرع قمحايه...يطرح رغيف.
خليك زى نسمايه حلوه
تعدى على حران ف عز الصيف.
خليك زى نقطه ميه تروى عطشان..
زى الغطا اللى يدفى ف الشتا بردان.
خليك حضن يساع الناس ..ضهر يتسند عليه كفيف.
خليك بسمه تفرح قلب طفل .. لمسه حنان لكهل..
خليك مجرد ......انسان نضيف
وافتكر اننا...
كلنا .... انسان ..... ضعيف...
فامتتكبرش ..
خليك خفيف...عيش عليها زى ضيف.