ما بين الخطوة والتانية
محمد ضباشه
مابين الخطوة والتانية
وأنا ماشى فى عز الليل
مليون خطوة بتسبقنى
وريح صفرا تهد الحيل
وبيوت عتمة ومقفولة
ولا بيدى يارب دليل
أنور جواها ميت شمعة
وأسمع فيها غنى ومواويل
واقول للخطوة تسبقنى
تجيب بكرة بشكل جميل
ماسك قلبى أنا بيدى
وفى عنية جوابى قليل
لاخطوة فيهم شافت شمسى
ولا خطوة فيها قناديل
تنور تحت رجلية
وأشوف فرحة فى قلب عليل
وخطاوى زى قلتها
بخيبة يكيلوها كيل
وبين بكرة وخطاوية
جناح مكسور وماشى ذليل
-
مابين الخطوة والتانية
خطوات سودا وعميانة
لا شايفة طريق يوصلها
وماشية جنبى قرفانة
تدب الخطوة تفزعنى
أرجع كام خطوة تعبانة
ليالى أسهر أداويهم
وسنين عدت ما شيفانا
وكل يوم أقوم أسأل
ليه خطاوينا حيرانة ؟
أسمع منهم جواب واحد
يا بنى الدنيا خربانة
-
مابين الخطوة والتانية
أمل ضايع بقالة سنين
وعيون من بعيد باصة
على كرسى بوش حزين
وأيدين من خوفها ورعشتها
ضيعت من البطون ملايين
الجوع بيصرخ فى أحشائها
وتقول يا ساسة أنتوا مين
لا فيكم اى شبه منا
ليه بس عننا غايبين
د احنا الأصل بالخطوة
وأحنا الضل للراكبين
اللى شافوا نهار بكرة
وحصدوا من زرعنا البساتين
وسابونا فى ليل بعداده
بيعد المرضى والمساكين
-
ما بين الخطوة والخطوة
متين خطوة ومدبوحة
بكام ورقة وكام شكوى
وفيها الشكوى مجروحة
تصرخ ماحد يسمعها
وباتت صارخة مبحوحة
كمان تبكى مفيش فايدة
وطرق الوصل مشروخة
ووش الكرسى بان ضهرة
وصومنا برؤيا مغشوشة
فصرخ صبرنا فينا
فى أعلام على القصر منقوشة
تقول تحيا نقولها لمين
لناس قاعدة ومشروحة
وسايبة الكل بيعانى
على أرض الفقر مطروحة
