مش عايزة
تبكي ..
ليه .. ماتبكي
ماإللي جنبك
مش هنا
حتى يمكن
تسأليه ..
هوه دا
إللي إسمه أنا
خايفة أشمت ..
خايفة أفرح ..
ليه بدموعك ؟
ليه دا أنا ..
ماأقدرش أجرح
أوتهوني علية
أوصل إني أبيعك
وإنتي بعتي ..
أيوه بعتي
ضاع كلامي
وأنا بقولك
إشتريني ..
كلميني ..
إفهميني ..
قدريني
قد إيه شوفتك
معايا
وكنت بسأل ..
فينك إنتي؟
خللتيني أحس
إنك
واحدة تانية ..
خلتيني أحس
إنك
مش حبيبتي
..........
هوه دا
اليوم إللي ياما ..
حلمت بيه
ترجعي لنفسك
شوية ..
تعرفي
أنا كنت إيه
مش هقولك
كنت روحك ..
كنت عمرك
مش هقولك ..
إن لية
في دق قلبك
إن دمي
هوه دمك ..
حلم عمري
هوه حلمك
..........
مش أنا
إللي أشمت
في دمعة ..
قبلك إنتي
شربتها ..
مش أنا
إللي أتشفي
فيكي ..
حتى لو
حلمي إنتهى
مش طبيعتي ..
مش طبيعتي
ضاع كلامي
وأنا بقولك ..
إشتريني
كلميني ..
إفهميني ..
قدريني
قد إيه شفتك
معايا
وكنت بسأل ..
فينك إنتي
خلتيني أحس
إنك
واحدة تانية ..
خليتيني أحس
إنك
مش حبيبتي ..
مش حبيبتي
..........
إستنيت اليوم ده كتير لحد ماجه ..وشوفت الندم على جرحي منك ..في عينيكي ..شوفتك عايزة تبكي وخايفة إني أشمت فيكي ..الدموع إللي حاولتي تمنعيها دي ..هي أجمل حاجة عرفتها منك..إستنيتها ولماجه أوانها ..كنتي عايزة تحرميني منها ..بس أنا عايز أقولك حاجة..أنا رغم دموعك ..ورغم ندمك ..رغم حاجات كتير قوي ..بتعترفلي بقسوة جرحك وبتعتذرلي ..صدقيني .. أناعمري أبدا ماهسامحك..عمري أبدا ماهسامحك.. عمري أبدا ماهسامحك
