كل يوم الهجر بقلم الشاعر / عبد الله السعيد

كُلّ يوم الهَجْر ياكُل
سِنَّه من حَبْل الوِداد
والوِداد دا حَبْل طُوُلُه
بطُوُل بَقاءنا فِ الحَياه
والطريق لازِم هايخْلَص
بِنَّا بالموت الأكيد
وامَّا ييجِىِ الموت هانِنْدَم
لجْل ضَيَّعنا الساعات
بَل هانِنْدَم عَ الدقيقَه
اللِّىِ احنا فيها عَشان حاجات
تافهَه سابِت إيدى إيدِك
وانتى لجْل تقيد شُموعِك
وفْ طَريق تَحْقيق وجُودِك
دُستى فوق قَلْبِىِ اللِّىِ غاب
عُمْرُه يحْلَم بيكى زوجَه
ولَمَّا جَمَّع بينَّا باب
كلّ واحِد فينا أصْبَح
فِكْرُه للتانِىِ عَذَاب
حتَّىَ شِعْرِىِ حِسُّه أصْبَح
لونُه مايل للسَواد
بعد ما كانِت قَصايدى
بيوْصِفوها بإنّ قاد
فيها حُبِّك نور لايُمْكِن
ينْطِفِى ليوم الحِساب
بَسّ يا خسارَه النِهاردَه
الهَجْر خَلا النور دا غاب
واللِّىِ كان طاير يرَفْرَف
فِ السَما وفوق السِحاب
اما كان بيحِسّ قُرْبِك
(قلبى) أصْبَح مِ العَذاب
نِفْسُه يخْلَص مِ الحَياه دِىِ
وينْدَفَن تَحْت التُراب
بقلم / عبدالله السعيد

http://www.youm7.com/images/NewsPics/large/s12011682757.jpg