*** مفيش ***
ايوا عرفت ترخص نفسك
لما بنيت ع الوهم قصور
لما رسمت قلوب على كيفك
لما قبلت تكون مقهور
و استنيت احلام مجنونة
و اتعشمت يجيلك دور
ما اتعملتش من ميت مرة
امتى تقول لخيالك لأ
ما اتجرأتش قلبك يصمد
او فى هواها يبطل دق
سيبت كتير من غير ما تحاسب
ما اتمسكتش مرة بحق
يبقى قرارك ان فى نارك
تحرق حبك و ما تبكيش
تنسى امانى كانت بتعانى
من افكار جواك بتعيش
و اما الحلم الساكن روحك
يسأل عنها ... قوله ... مفيش
فهمي علي
