ياعم يابو البنات
هيهات ترتاح هيهات 
شايل الهموم بالكوم
وياك لحد للممات
البت دى غضبانه 
والتانيه كمان غلبانه
والتالته بتبكى وتشكى
وتقول حماتى قرفانا
ودى جوزها مش شايفها
يسهر برا وقارفها
واللى جوزها منحوس 
واللى مش لاقيه فلوس
ودى جوزها عامل دوشه 
وجايبلو دايما روشه
ودى مش حابه شقتها 
ودى مين سود عيشتها
وحلق ياعم حلق
البت دى هتطلق
ومحاكم ونيابات
وحكاوى على حكايات 
ومحاضر ف اللقسام 
والحقنى يا عم إمام
وشوفبلى محامى يا لميس 
يكون شاطر ورخيص
هات عفش وودى العفش
إدخل ياحبيبى متخافش
والبت دى راجعالى 
جايبه عيالها على عيالى
وكلام كتير ف الصوره 
بس نخليها مستوره
هيهات ترتاح هيهات 
ياعم يابو البنات