فين يا زين العقل فين
أما صحيح عالم مجانين 
الدنيا فيها كدا وكدا 
وناس عبيطه بالشكلدا
أخينا له عقل مكفيه
يروح ويقعد ع الكافيه
ويسقف هات اتنين عصير 
شكل الحساب هيكون عسير 
وهاتلى شيشه معاها حجرين
ومن السجاير علبتين
وقشر موزه وشد الجوزه 
والترابيزه كمان محجوزه
كام الحساب وياك يابيه
بسيطه دولا ميتين جنيه
ثم نبكى نقول ونحكى
ليل نهار م البخت نشكى
والدنيا غاليه ياعبد العال 
نجيب منين مصاريف عيال
عندك حق يا سى حموده
دى الماهيه كمان محدوده
إدينى عقلك فين مشاكلك 
كتير معاك زيك وشكلك 
فين يا زين العقل فين 
أما صحيح عالم مجانين