وحياة أبوك متزعلنى 
أنا اللى فيا مكفينى 
ومش هقولك شيل عنى
ولا حتى خدنى وودينى
صباح الفل ياشيخ مظبوط 
تاخد كام وتسيبنى فحالى
أنا جنبك حتة كتكوت 
بكره الدنيا هتحلالى
عمال نازل لوك لوك لوك 
تعاليلى ياما دماغى اتفلقت 
عقلى خلاص منك هيفك 
وودانى من القر اتسلقت 
متحوش عنى ياشيخ علام 
صاحبك دا هيفرهدنى
خلاص ياعم هرانى كلام
ساب كل حاجه وخد ودنى
هات ورقه واكتب إقرار
هبصم بالعشره وامضيلك
والمرادى آخر إنذار 
شوفلك غيرى حد فاضيلك
كل صباح فى البخت نصيبى
حود م الناحيادى تعالالى 
خدلك أجازه بقى ياحبيبى
أنا مش هبقى عمرى مثالى
أصلى بحب اغلط واتعلم
وأرجع اعيد م الأول تانى
مبتعلمش الا مبتألم
نفسى تقعد هنا فى مكانى
فى الشارع اللى ورانا وحشين
كل يوم قاعدين تلاقيهم 
شوفلك واحد وللا اتنين
إنصح فيهم بقى ربيهم
مارس هوايتك فى الإصلاح
وريهم إمكانياتك
خد راحتك والدنيا براح
يمكن مره تحقق ذاتك