قول يا ولد لأمك وابوك وهما قاعدين ع الكنب إللى بيزرع شجرة شوك مش هيقطف منها عنب هادى الأبيات دونتهم لشباب بشوفو بينحدر وبلوم الأهل وبتهم لو مخهم فيهم حضر والست نانا ليه زعلانا من قلة الزوق والأدب بتشكي ليه وتقول آه يانا مع إنها هيا السبب يا كل أب ويا كل أم فين ياخواتى الجيل الصالح ليه خلفكم حالو يغم رذل ودمو تقيل وكالح سقيتوه طمع وللا جشع وللا عشاه مش من حلال خلفتوا ليه إنسان بشع مدام بتشكوا من الأحوال بقى كل ميه نلاقى واحد تحب تبصلوا بعينيك والباقى قليل الزوق وجاحد تبعد ليرمى بلاه عليك صح التقى يخلف تقى والكريم ينجب كريم أما الولد لو كان شقى ربك بقى بأهلو عليم