أنا اللى برسم بالكلام 
لوحه حلوه والسلام
عمى سلامه سلم عليك 
الله يسلمو ويخليك
شوفتو فين ياواد يا حسين
دنا نفسى اشوفو من سنين
كان عند دار عمى أبو جوده
وكانت وياه خالتى ام حوده
ومجيبتهمش ليه حدانا 
يتعشوا ويباتوا ويانا
أما انتا واد ملكشى معنى
يقولوا إيه الناس بتوعنا
وحياتك يابا مسكت فيهم
مكنتش راضى اسيب إيديهم
قال معلش اليوم سامحنى
وحيات الغالى عندك ريحنى
واقول لبوك هجيلو مخصوص
زياره لوحدو بالخصوص
تعالى اسمعى يامو فوزيه 
كانت فى الكفر اختك بهيه 
والشيخ سلامه ومحودوش
بقى يبقوا حدانا وميسألوش
يبقى جنب الدار ويمشى 
دول أهل الكفر هياكلوا وشى
تيجى منك يا شيخ سلامه 
دى تستحق عليها الملامه
خلاص معلش يابو حسين 
جايا الأيام ومش رايحين
هنروح بلدهم منزورهمش 
نعمل كمان منعرفهمش 
يادى العيبه اسكتى ياوليه 
عاوزه تجيبى الحق عليه
وعشان مطولشى كفايه 
اللوحه كدا خلصت معايه