انا العامي
انا إللي دفعت من دمي
انا اللي صبرت على صبري
ومن همي
ماشوفتش خالي
ولا عمي
انا للي قفلت على نفسي
غريب داري
داريت على روحي اْفكاري
واْسراري
يعلمها العالي والداني
انا اللي سمعت بوداني
خبر سجني مع موتي
لو اْخرج ع الطغاه
بصوتي 
لو حتى سلاحي إحساسي
قلمي وعيني كراسي
بشوف بيها وبتسجل
اْدي الاْتي بيتحنجل
واْدي الظيطة والمندل
مسابقة شوفوا مين
اندل
-
انا العامي
انا اللي دفعت من دعمي
ضريبة ف الاْساس
خيبة
وديما يفرحوا بغمي
انا اللي رموني
في مصيبة
ولسه بيلعبوا ف وهمي
لا بتعلم ولا اتعالج
ومهما إتذكيت
سازج
بيقولوا إن انا رايق
وتوب الحر مش لايق
عليا إنكتب عيبي
بيئة دنيئة ونصيبي
انا في الدنيا والعالم
لا بقيت حافظ ولا فاهم
بقيت اْول من الاْخر
وحتى لو اْفكر اْسافر
مافيش فيزا ولا تذاكر
ومين سامع ومين فاكر
-
انا العامي
انا اللي ماقدروش عشمي
داسوني صحراوي زراعي
نحتوا الفقر على جسمي
باعوني جملة وقطاعي
وحتى ماكفنوش لحمي
انا اللي كتير اْوي منو
يموتوا ولا يتسجنو
انا من عيلة مستورة 
وفضحوها
انا اللي حياته مقفولة 
وفتحوها
انا من درب مساحيلها
وجالي جفاف مع نيلها
بتطلع روحي واْدعيلها
واْي قضية انا اْشيلها
انا
العامي