قالت لى 
هات لى
هديه
تليق 
بحبنا الهادى والمجنون
مر على حبنا 
الف ليلة 
صيف بنسيم محبوس 
وكام شتويه 
نايمه بردانه 
فى حضن الظل 
جبت لها 
عقد خرز 
مجدول بالورد 
والياسمين والفل 
والخرزه زرقا 
فى عيون حاسدين 
وقاعدين يراقبوا الكل 
والفل و الياسمين 
سرقتهم بالليل 
من سور جنينه 
على حبنا بتطل 
وحينا المشقوق 
نصين علينا يغير 
ويغر الطامعين
وتفريعه ضعيفه لترعه 
من نهر النيل الحزين 
جت مخصوص 
تقف بينا 
زى الغفير 
على الظل 
والضحكه مقسومه 
بالمظبوط .
.تلتين للاغنيا والباشوات 
والتلت بعد الخصم 
يتقاسموا كل الغلابه 
من ولاد الحى 
والضحكه من فقرها 
ظهرت ضعيفه 
بوش اصفر 
وضحكه بهتانه 
وعظمها مكسور 
ومتزوقه بالذل 
حبيبتى خدت 
الهديه بسرعه
كانها سرقاها 
وسحبت منى بسمتها 
بكل قسوه وغل 
وجيران بارواح عريانه 
واجسام حجر منقوش 
والنفس متعلقه بالمقلوب
ع حيطة مقام 
لشيخ مجهول 
ومولانا الحاكم بامر ضميره 
المدفون فى المتحف 
مش مبسوط 
بيقول ازاى ولاد البلد 
تشخبط على الحيطه
ويشتكوا للعفاريت
ويعملولى زار 
ويدعوا ازاى على عصابتى 
والاعوان وكل الخلايق 
متورطه فى سكوت محمود 
وساندين ظهرهم للحيط