امته تيجي يالحمه بيتنا وتشفي غليلي
ولما تيجي هاغني غنوتك بس اوعديني
تعالي مره زوري بيتنا وفرحيني
وغيبي تاني واوعدك ماتوحشيني
وكفايه عليا تيجي مره في المنام
او تيجي ويآ قرايبك وتحققي الأحلام
دا انتي ياما بغيابك عني عذبتيني
ولما بشوفك بعيده عني بتتعبيني
لعجز ابويا ونظرة امي اللي بتبكيني
ودموع عنيهم وحسرتهم لما يشوفوكي
ماانتي حلم ونفسهم عشاني يشتروكي
وياما عذبهم غصب عني لهفتي عليكي
لما بيشوفوا اشتياقي وحنيني إليكي
ما احنا بقالنا شهور وشهور من زمان
ومش فاكر اليوم اللي جيتي فيه والمكان
ومن يومها غدانا وعشانا وكمان فطورنا
خاليه ومحرومه منك شهور بطونا
وهوا نفس النوع بناكلوا يوماتي
رفعوا سعرك وبقيتي غاليه وقاسيه علينا
وانتي اللي عمرك ماكنتي ناسيه لينا
كنتي يالحمه حنينه وعلينا بتسألي
وكنتي دايماً بتزوري بيتنا مابتتاخري
كنتي ضيفه عزيزه علينا وبتسعدينا
ومره واحده قاسيتي علينا وحرمتينا
من يوم مابقيتي في ايد وحوش سعرانه
ومن غير رقابه ومسئول بيرحم الغلابه
وزاد معانا المحرومين والبطون الجعانه
كل يوم سعرك مطلعينوا في العلالي
وياما قولنا فين الرقابه وغُلُبنا نِلالي
وكل ليله بتسأل عليكي عينيآ ومعدتي
من يوم مااتفقتي انتي وقرايبك عنآ تبعدي
ومن زمان حاسس معاكي يالحمه بغربتي
وعن الغلابه سافرتي وسرقتي فرحتي
حرمونا منك يالحمه ومن شوربتك
نسوناصورتك ومن ذكرياتي تاهت غنوتك
انسينا يالحمه وخلينا راضيين بحالنا
وف منامنا لاتيجي ولاتشغلي بالنا
كنتي صديقه حنينه ع الغلابه أيام زمان
وعمرك ما كنتي بتجيلنا في المنام
ومره واحده قليتي أصلك وبقيتي احلام
وبعدتي عنا وعن ناس كتير غلابه
ورايحه جايه يوماتي لبيوت الديابه
دا احنا كنا بنعزك يالحمه وعارفين مقامك
ومافي يوم كنا حتي بنرمي عظامك
الله يسامح اللي فرق بينا وبينك
وخلاكي تغيظي فينآ وتقولي بعينك
روحي الله يرحم ايامك وايام زمانك
وانتوا ياللي كل يوم في سعرها بترفعوا
خليها ليكم بس ياريت ييجي يوم وتشبعوا
واحنا لينا رب عادل واسمه الكريم
هياخد حقنا من كل مستغل وطماع لئيم
