ضرتين ولا حما 

مبتقبلنيش ومبقبلهاش
لو هيا قويا ومتحكما
راحت الجوازه ياعم بلاش
مع جوز البنت ملاك رحمه
ومرات ابنها قلبها فحمه
إبنها بتشيلو على راسها 
ومراتو حطاها تحت مداسها
تصنع مشاكل بمهاره 
تصطاد الغم بسناره
مهما تقولها أو مهما تعيد 
دماغها أنشف م الحديد
سيبيهم بس ياماما عيشى
أبدا وانا عايشه ميتهنوشى
وتبقى نصيبه لو جوزها 
عايم راخر على عومها
شافت زمان من الحما 
شربت وصبحت ملهما
م الحبه تعمل ميت قبه
حلوه فنفسها قشطه مربه
لسانها عفيف مبيغلطشى 
ومرات ابنها متربتشى
محتاجه تنعاد تربيتها 
حالفه بأمها تخرب بيتها
من ليلة الدخله ومناكفه
شايفاها بنظره مختلفه
وتهد بيوت كات عمرانه
والبنت هيا الخسرانه