النهارده يوم الوقفه وبكره عندي احلي عيد
علشان حبيب قلبي وفرحة عمري جاي من بعيد
ياأحلي بكره هيجيني فيه حبيبي وبعد غيابه هيفرحني وهيهنيني
مش عارفه هقابله ازاي وهعمل إيه في نار شوقي اللي سابقاني لحنيني
أصله طول حبيبي عليآ البعاد 
وهو ضي عيني وعذبني الغياب
وياهل تري هحاسبه علي اللي عملوا فيآ ولاَّ هيكون كفايه عليه العتاب
ماهو ليالي هجره كتير عذبتني وياما الليالي الطويله سَهَّرِتّْني
طب أعمل إيه لماَّ أقابله هاخده في حضني وتبان عليا لهفتي وفرحتي
ولا حنيني وشوقي اللي يامآ كواني غصب عني هيبكيني وتسيل دمعتي
مش عارفه ليه خايفه من اللقاء وطول الليل بافكر هعمل فيه ايه
اصله في ليالي الغياب يامآ السهد عذبني والشوق إليه ضناني
ويامآ في ليالي إنتظاري ليه ...
حرماني منه وحنيني اليه بكاني
وضاعت ليالي كتيره حلوه حلمت بيها معاه إتحرمت منها وانا في عز اشتياقي
ياخوفي علي قلبي قبل عيني من لقاء باتمناه من زمان وكنت هموت عليه
ومن ساعة مافرحني حبيبي وقاللي جاي بكره والفرحة مبكيه عنيا
حسيت بحضنه بيدفيني وانفاسه جوايه مخلياني عايزه اطير اليه
وحسيت بعمري إللي هيبتدي من بكره وهشوف النعيم كله فحضنه وبين إيديه
علشان هوحبيبي وجنتي وغرامي اللي دايبه فيه
وهو عشقي وهو جنوني اللي كبرت وأنا باحلم بيه
وهو الدنيا الجميله اللي حس بيها قلبي وشافها وعاش فيها من قبل ماتشوفه عيوني
وهو عمري اللي غاب عني سنه گإنه غايب عني من سنين
عيشتها مع طيفه وخياله وصورته مابين الشوق والآهات والأنين
حتي روحي سابتني وسكنت مع روحه والفرحه والبسمه في غيابه هجروني
وبكره هيبقي احلي بكره ورد الجناين هيزَهَّرْ والشمس هتدفي كل الأيام
وقمري هينورلي من بكره الليالي وهيسعدني ليلاتي باحلي غرام
وهاجمع كل شموع الحب من كل مكان هنا وهناك وهقيدها لحبيبي بإيدي
آاااه يآفرحة قلبي وفؤادي الليلادي وآاااه من طول الدقايق والثواني
وآاه من أحلامي والف آااه من خوفي علي دقات قلبي وقت اللقاء
وآه من امنياتي ومن فرحتي عايزه اطير اجيب لحبيبي بدل الشموع نجوم السماء
يارب هون عليآ الساعات اللي جايه وعديها علشان خاطري بسلام
وخليها بسرعه تعدي ومن غير ماأحس بعذابها ونار شوقي تهدي
واغمض عيني وافتحها والآقي حبيبي ونن عيني وفرحة عمري جوه حضني
واعيش انا وحبيب قلبي احلي ايامي وأحقق أحلآم عمري وما يبعد تاني أبداً عني